Македонскиот научник Петар Поповски е назначен за член на Кралската данска академија на науките и книжевноста, една од најпрестижните научни институции во Данска.
Веста ја соопшти самиот Поповски преку објава на социјалните мрежи, истакнувајќи дека членството во Академијата претставува голема чест и признание за неговата долгогодишна научна работа.
„Привилегиран сум што станав член на Кралската данска академија на науките и книжевноста, чијшто некогашен претседател е еден од моите херои, Нилс Бор. Би сакал да им се заблагодарам на научниците кои ја поддржаа мојата номинација и со нетрпение очекувам да придонесам за активностите на Академијата преку призмата на теоријата на комуникацијата и технологијата“, напиша Поповски.
Од Академијата информираа дека 30-те новоизбрани членови ќе учествуваат во нејзините активности насочени кон унапредување на научните истражувања во служба на општеството. Со тоа, тие се приклучуваат на друштво во кое низ историјата членувале истакнати научници како Нилс Бор и Ханс Кристијан Орстед.
Петар Поповски е роден во Охрид во 1973 година. Дипломирал и магистрирал на Електротехничкиот факултет во Скопје, а докторирал во 2004 година на Универзитетот во Олборг во областа на безжичните комуникации.
Денес тој е препознаен како еден од водечките светски експерти во областа на безжичните комуникациски системи, комуникациската и информациската теорија. Неговата научна кариера е тесно поврзана со Универзитетот во Олборг, каде што работи повеќе од две децении.
Покрај тоа, Поповски е визитинг професор на Универзитетот во Бремен во Германија, главен уредник на престижното научно списание IEEE Journal of Selected Areas in Communications и претседател на IEEE Communication Theory Technical Committee, едно од највлијателните тела во областа на телекомуникациите.
Тој има значајна улога и во развојот на идните генерации комуникациски технологии. Претседава со Шведската истражувачка фондација за 6Г безжични системи, член е на Данскиот истражувачки совет за технологија и производство и е дел од раководните структури на повеќе компании и истражувачки организации поврзани со сателитските комуникации.
Зад неговото име стојат повеќе од 300 научни трудови објавени во меѓународни списанија, книги и конференциски изданија, како и повеќе од 30 патенти и патентни апликации.
Изборот на Петар Поповски за член на Кралската данска академија претставува уште едно значајно меѓународно признание за македонската наука и потврда дека знаењето, истражувањето и посветеноста можат да остават силен белег и надвор од границите на државата.
…
