Светската метеоролошка организација (WMO) предупреди дека климатскиот феномен Ел Нињо веќе е во тек и се очекува брзо да прерасне во силен настан во периодот од јули до септември, што значително ќе ја зголеми веројатноста за екстремни временски услови во повеќе делови од светот.
Според најновиот сезонски климатски извештај, температурите на површината на морето во екваторијалниот Пацифик веќе се над просечните вредности, а прогнозните модели покажуваат натамошно интензивно затоплување. Од организацијата наведуваат дека постои висока согласност меѓу климатските модели, што ја прави прогнозата особено сигурна.
Ел Нињо е природен климатски феномен кој се јавува кога водите во централниот и источниот дел на екваторијалниот Пацифик се затоплуваат, предизвикувајќи промени во атмосферската циркулација и режимот на врнежи ширум светот. Вообичаено се појавува на секои две до седум години и трае од девет до дванаесет месеци.
Според WMO, актуелниот развој укажува дека Ел Нињо ќе достигне силен интензитет, што може да предизвика суши, обилни врнежи, екстремни топлотни бранови на копното и морски топлотни бранови.
Генералната секретарка на организацијата, Селест Сауло, изјави дека условите за Ел Нињо веќе се воспоставени и дека неговото зајакнување ќе го зголеми ризикот од сериозни временски екстреми во наредните месеци.
Најизразените последици се очекуваат во текот на есента на северната хемисфера, додека врвот на феноменот најчесто се достигнува помеѓу ноември и февруари. Прогнозите покажуваат дека голем дел од светот би можел да се соочи со температури повисоки од просекот, додека распределбата на врнежите ќе биде нерамномерна – со повеќе дожд во делови од југозападниот дел на САД и посушни услови во Индија и поголемиот дел од Австралија.
Од WMO нагласуваат дека нема докази оти климатските промени ја зголемуваат зачестеноста на Ел Нињо, но предупредуваат дека глобалното затоплување може да ги засили неговите последици и да доведе до поекстремни временски појави.
Организацијата истовремено работи на унапредување на системите за рано предупредување за земјите навреме да можат да преземат мерки за заштита на населението, земјоделството, здравствениот сектор и инфраструктурата.
…
