Во Штип се активни два поголеми пожари – на тврдината Исар и во селото Чардаклија, каде што се зафатени фотоволтаични системи и се предизвикува значителна материјална штета.
На терен во населбата Исар се ангажирани сите расположливи противпожарни возила, пожарникари и доброволци од ДПД Штип, како и локални жители и волонтери. Со цистерни со вода, лопати и помош од околните куќи, тие се обидуваат да спречат ширење на огнот кон најблиските објекти.
Градоначалникот на Општина Штип, Иван Јорданов, изјави дека за среќа нема повредени лица и дека во населбата Исар досега не се зафатени куќи.
Според првичните информации и искази на очевидци, се претпоставува дека пожарот кај Исар избил поради искрење од жица на електричен столб.
Јорданов информира дека истовремено пожарот во селото Чардаклија зафатил фотоволтаични панели, при што е регистрирана поголема материјална штета.
Директорот на Дирекцијата за заштита и спасување, Стојанче Ангелов, најави дека во гаснењето на пожарот на тврдината Исар ќе биде вклучен и ер трактор.
Поради состојбата, затворен за сообраќај е дел од булеварот „Гоце Делчев“, а надлежните апелираат граѓаните да ги следат инструкциите и да избегнуваат движење во погодените подрачја.
…
