Хрватската полиција и семејството на 16-годишната Габријела Јан Лончариќ упатија итен апел до јавноста за помош во нејзиното пронаоѓање, откако девојчето исчезнало на 25 јуни 2026 година на подрачјето на Задар.
Оттогаш, за неа нема никакви информации, а потрагата продолжува со надеж дека некој ќе препознае важен детал што може да помогне во нејзиното пронаоѓање.
Според официјалните информации, Габријела е висока околу 165 сантиметри, тешка приближно 55 килограми, има долга светлокафеава коса и кафеави очи.
Во моментот на исчезнувањето била облечена во црна маица со кратки ракави, црни кратки панталони и црни патики.
Во потресна објава на социјалните мрежи, мајката на исчезнатото девојче открива дека семејството веќе десет дена живее во болна неизвесност.
„Времето минува, а за нас запре во моментот кога исчезна Габријела. Секој нов ден без неа носи само повеќе прашања и уште поголема празнина. Ве молиме, не поминувајте само така покрај оваа објава. Погледнете ја нејзината фотографија, споделете ја и помогнете да стигне до што повеќе луѓе. Можеби токму некој од вас има информација што ќе нè одведе до нашето девојче“, напиша таа.
Во емотивната порака, мајката директно ѝ се обрати и на својата ќерка:
„Габријела, ако го читаш ова… Знаеш ли колку те бараат браќата? Баба секој ден се моли за тебе. Што и да се случило, што и да носиш во срцето, те молам, само јави ни се. Твојот дом не престана да биде твој дом. Те чекаме денес, утре и секој ден додека не ни се вратиш.“
Хрватската полиција ги повикува сите граѓани кои имаат какви било информации за движењето или местото каде што би можела да се наоѓа Габријела од 25 јуни наваму, веднаш да ја известат најблиската полициска станица, да се јават на бројот 192 или да испратат информации на официјалната електронска адреса **nestali@nestali.hr**.
Надлежните апелираат дека и најмалиот детал може да биде од пресудно значење за успешно пронаоѓање на девојчето.
