Вознемирувачка сцена денеска во Велес, во периодот кога температурите се највисоки. Коњ кој влечел запрежна кола паднал на коловозот и угинал на улица над Автобуската станица.
Според објавата на локалната страница „Ти Реков Ми Рече“, настанот се случил околу пладне, а животното останало да лежи на патот, додека на местото се собрале повеќе граѓани.
Случајот повторно го отвора прашањето за користењето животни за влечење запрежни коли во услови на екстремно високи температури, особено во најтоплиот дел од денот.
Последниве денови жештината веќе предизвикува сериозни здравствени проблеми и кај луѓето. Претходно беше регистриран и случај на возач кој поради високите температури колабирал зад волан, изгубил свест и предизвикал сообраќајна незгода.
Во Велес, пак, денешната сцена со угинатото животно предизвика реакции и повторни повици за поголема контрола и почитување на Законот за заштита и благосостојба на животните.
Засега нема официјална информација за точната причина поради која коњот паднал и угинал, но фактот дека настанот се случил среде пладне, во период на високи температури, дополнително ја отвора темата за условите во кои се користат запрежните животни.
