На само два километри од Прилеп, Македонија од 2023 година има современ ИКТ центар наменет за чување на податоци и опоравување на информатичките системи во случај на катастрофи.
Објектот е реализиран од Министерството за внатрешни работи, а инвестицијата изнесува околу 11,5 милиони евра. Станува збор за еден од најзначајните државни проекти од ваков тип во регионот, чија главна цел е обезбедување дополнителна заштита на критичните податоци и информатичката инфраструктура.
Центарот е дизајниран да обезбеди зачувување на податоците од примарниот информатички систем во ситуации предизвикани од природни непогоди, како земјотреси, но и во случај на човечки фактор, вандализам, терористички закани или прекини во снабдувањето со електрична енергија.
Објект проектиран со високо ниво на заштита
Според проектното решение, објектот е конципиран со посебно внимание на физичката безбедност и заштитата на информатичката опрема.
Центарот располага со двојни армирано-бетонски ѕидови, дополнителна термичка и противпожарна изолација, како и заштитна ограда околу целиот комплекс.
Безбедноста е дополнително засилена со 24-часовен видео надзор и физичко обезбедување, додека пристапот до објектот е строго ограничен.
Проектот е изработен од белградското архитектонско студио „1Х2 Студио“, предводено од архитектот м-р Зоран Абадиќ.
Со изградбата на овој центар, државата доби инфраструктура која има за цел да обезбеди континуитет на функционирањето на клучните информатички системи и заштита на податоците дури и во услови на сериозни непредвидени ситуации.
Дата центарот кај Прилеп претставува значаен дел од современата дигитална и безбедносна инфраструктура на Македонија.
…
