Нема регистрирано труење кај деца во Тетово, ниту има причина за паника поради зголемениот број прегледи и хоспитализации во Клиничката болница Тетово. Од установата појаснуваат дека бројките се однесуваат на период од 48 часа и дека станува збор за пациенти со различни симптоми и дијагнози.
Директорот на Клиничката болница Тетово, д-р Ерзен Елези, вели дека во изминатите 48 часа биле регистрирани 139 приеми, од кои 12 деца биле задржани на болничко лекување. Според него, ваквите бројки не се невообичаени за овој период од годината.
„Како што е пишано по порталите, тоа не е точно. Нема место за паника. Бројките се за 48 часа, што е нормално, и други години било така. Во тие 48 часа прегледите и хоспитализациите се со различни симптоми, не се исти. Имаме пациенти со горнореспираторни инфекции и, нормално, со вируси“, изјави Елези.
Неговата изјава следува по реакцијата на Алијансата за Албанците, од каде што обвинија за, како што велат, двојни аршини при известувањето за бројот на пациенти во Гостивар и Тетово.
Од партијата наведуваат дека во Гостивар биле објавувани кумулативни бројки во кои биле вклучени и повторени прегледи, контакти со здравствени установи, телефонски повици и советувања, додека реалниот број на хоспитализирани пациенти бил значително помал.
Од друга страна, од здравствените институции во Тетово нагласуваат дека нема пријава за сомнеж за труење ниту до Центарот за јавно здравје, ниту до Институтот за јавно здравје.
Во овој период од годината, кога температурите се високи, лекарите очекуваат поголем број пациенти со цревни инфекции.
Слична состојба се забележува и на Клиниката за детски болести, каде дневно се регистрираат околу 100 прегледи. Директорот на клиниката, д-р Реџеп Мемеди, посочува дека околу 60 проценти од пациентите се со симптоми карактеристични за цревни инфекции.
„Вообичаено овој период од годината, поради високите температури, доминираат цревни инфекции со дијареа, повраќање, понекогаш фебрилност и дехидрираност. Бројката не е невообичаена. Ние имаме околу 100 прегледи за едно деноноќие, но имаме и други патологии. Околу 60 проценти се цревните инфекции, но така е секоја година“, вели Мемеди.
Педијатрите апелираат до родителите да ги почитуваат препораките за заштита на децата во периодот на високи температури. Особено внимание треба да се посвети на редовниот внес на течности и спречувањето на дехидрација, особено кај малите деца.
…
