Европските пристаништа од јануари до септември примиле 12,18 милиони тони течен природен гас од рускиот арктички проект „Јамал“, што е за 9,5 отсто повеќе во споредба со истиот период лани. Според анализата на германската организација „Ургевалд“, заснована на податоци од аналитичката компанија „Кплер“, вредноста на увозот достигнала 7,9 милијарди евра.
Во деветмесечниот период биле реализирани 167 испораки, а на европскиот пазар завршиле 85 отсто од вкупниот извоз на гас од „Јамал“.
Франција се издвојува меѓу најголемите увозници. Во септември, нејзините пристаништа примиле речиси три четвртини од испораките на руски течен природен гас во Европската Унија.
Од „Ургевалд“ оценуваат дека досегашните ограничувања имаат ограничено влијание врз трговијата. Само во септември во ЕУ пристигнале речиси 800.000 тони руски гас, чија проценета вредност изнесувала 818 милиони евра.
Според наведените информации, ЕУ од 25 април годинава го ограничила увозот на руски течен природен гас врз основа на постојните краткорочни договори. Забраната за увоз според опфатените долгорочни договори е предвидена за 1 јануари 2027 година.
Податоците укажуваат дека рускиот гас и натаму има значително присуство на европскиот пазар. Во пресрет на зимата, прекинот на овие испораки би можел да ја зголеми потребата од алтернативни добавувачи.
…
