Утринава во Скопје околу 02:45 часот полицијата уапси две лица Ј.Т. (19) и К.П. (19), двајцата од Скопје, поради сомнеж за извршено разбојништво.

Според МВР настанот се случил околу 02:30 часот, кога 22-годишен скопјанец пријавил дека бил нападнат од две лица во близина на Собранието во град Скопје. Осомничените, со закана со нож, му одзеле пари.

По пријавата, полицијата веднаш презела брзи мерки за лоцирање и апсење на извршителите. За кратко време, Ј.Т. и К.П. биле приведени, а одземеното било пронајдено и ќе му биде вратено на оштетениот. Пронајден е и предметот со кој е извршено делото.

По документирањето на случајот, против осомничените ќе биде поднесена соодветна кривична пријава.

Земјотрес со јачина од 2,3 степени според Рихтер вечерва во 22:13 часот ја потресе Македонија.

Епицентарот е 17 км југоисточно од Струмица.

Длабочината е 5 километри.

Сања Божиновска, министерка за енергетика, рударство и минерални суровини, заедно со Министерот за надворешни работи и надворешна трговија Тимчо Муцунски, престојуваше во работна посета на Прага, каде што се одржа продуктивна средба со чешкиот министер за индустрија и трговија, Лукаш Влчек. Целта на средбата беше зајакнување на економските врски помеѓу Северна Македонија и Чешка, како и отворање нови можности за инвестирање.

„Нашите дискусии ја истакнаа важноста на економската соработка меѓу двете земји и ги отворија вратите за нови инвестиции и идни можности,“ истакна Божиновска.

Таа нагласи дека со продлабочувањето на партнерството со Чешка, се создава стабилна основа за раст и развој на двете земји. Дополнително, Божиновска ги охрабри сите заинтересирани, особено во енергетскиот сектор, да ги препознаат можностите што ги нуди ова стратешко партнерство.