Република

ВО НЕГОТИНО Е ТРЕТИРАНО: Стручни лица ќе проверат од Кавадарци до Гевгелија дали се раширил отровниот плевел

Отровниот плевел Сребренолисен зрнец веќе е третиран во Неготино, но стручни лица од Здружението на граѓани Ековита од овој град, ќе работат во поширокиот регион, за да видат дали и таму е распространет. Повеќе активности на овој план најавуваат од идната недела.

Тој е опасен за животните и посевите и мора да се отстрани. Плевелот мора да го уништат стручни лица.

„Од следната недела очекуваме да почне да цвета бидејќи така најдобро се забележува, а поради ладното време се развлече периодот на цветање. Моментално е во вегетативна фаза. Само агроном или биолог може да го идентификува. Има зачетоци на цветови и очекуваме да се појави следната недела. Во расцветана фаза многу појасно ќе се наоѓа и тогаш граѓаните ќе можат да го откријат и тогаш може да почне кампањата, тогаш ќе можеме да ја испитаме целата рута од Гевгелија до Кавадарци. За жариштето во Неготино, физички е отстранет плевелот и испрскан со хербицид, додека второто жариште во Кавадарци доцни со вегетацијата и послабо се развива“, велат од Ековита.

По отстранување на минатогодишните суви изданоци на опасниот плевел Solanum elaeagnifolium, препознатлив по жолтите бобинки полни со семе, тимот на Ековита спроведе нова теренска акција насочена кон третман на младите изданоци во рана вегетативна фаза. Акцијата вклучуваше третирање со тотален хербицид во појасот од 1 метар од асфалтот на индустрискиот пат во Неготино, со цел уништување на надземните и подземните делови на плевелот, кој се размножува и преку семе и преку длабоки ризоми.

„Ваквиот пристап е неопходен бидејќи растението покажува висока регенеративна способност – дури и по косење или плитко вадење, се регенерира од остатокот на коренот. Целата операција беше спроведена под стручна контрола и менторство на проф. д-р Звонко Пацановски, експерт за инвазивни видови од Земјоделскиот факултет во Скопје. Според професорот, Solanum elaeagnifolium е еден од најопасните инвазивни плевели во регионот, со висок ризик за добитокот и земјоделските култури, поради присуството на токсични гликоалкалоиди – соланин. Третирањето на жариштето во Неготино го изврши дипл. инж. агроном Кристина Тодорова, проектен координатор на „Екомисија“, со примена на методологија препорачана од професорот – вклучувајќи внимателно набљудување на фазата на развој, избор на соодветен препарат и безбеден третман. Очекуваме во наредниот период растението да влезе во фаза на цветање, што значително ќе ја олесни неговата визуелна идентификација – благодарение на карактеристичните виолетови цветови. Оваа фаза е клучна за ефикасно мапирање на нови жаришта и навремено уништување, пред да започне формирање на плодови и ширење на семе“, вели агроном Кристина Тодорова, проектен координатор на „Екомисија“.

Растението кое потекнува од Америка е отпорно на суша, има способност за брзо ширење преку ветер, вода, или слеп патник залепен на тркала на шлеперите.

„Професорот д-р Звонко Пацановски предупредува дека третманот мора да се спроведе пред фазата на зреење за да се намали ризикот од ново ширење. Следува мониторинг и мапирање на поширокиот регион од Кавадарци до Гевгелија, каде што според теренските индиции се можни нови жаришта. Кога ќе расцвета, ќе следи апел до граѓаните доколку го забележат веднаш да не информираат во Ековита. Заедно да го спречиме ширењето на овој плевел. На 13 мај во Неготино ќе се одржи завршен настан на проектот Екомисија каде ќе се прикажат досегашните резултати од акцијата за уништување на овој отровен плевел“, информира Тодорова.

Овие активности се дел од проектот „Граѓанските организации во акција за климатска промена“, кој го имплементира Еко-свест, со финансиска поддршка од Шведска.

Овој плевел ги загрозува тревопасните животни, односно растението е отровно за добитокот, а неговите алкалоиди можат да предизвикаат невролошки нарушувања, и во крајна линија и смрт. Го уништува земјоделството така што брзо се шири и ги задушува локалните култури. Растението е отпорно на суша и неповолни услови, а неговото семе може да се разнесува преку ветер, вода и возила.

Извор: faktor.mk

Република

Проданоски: Прилеп добива новогодишен базар по европски пример

Градоначалникот на Прилеп, Дејан Проданоски, денеска ја објави програмата за годинашното издание на „Прилепска празнична приказна“, манифестација која оваа зима ќе донесе празнична атмосфера, светлина, музика и заедништво во градот.

Проданоски изрази посебна благодарност за учеството и коорганизацијата на реномираната општествено одговорна компанија Витаминка, која следната година ќе одбележи 70 години постоење, нагласувајќи дека ваквите партнерства меѓу локалната самоуправа и домашните компании носат конкретни и видливи придобивки за граѓаните.

Во рамки на новиот, а сепак традиционален концепт, за првпат ќе биде организиран и Новогодишен базар со седум големи дрвени, празнично уредени куќарки, во кои ќе се нудат храна, пијалоци и ракотворби, создавајќи атмосфера по примерот на големите европски новогодишни базари.

Културно-уметничката и музичката програма, како и Новогодишниот базар, ќе бидат отворени секој работен ден од 17:00 до 21:00 часот, а за време на викендите посетителите ќе можат да уживаат во целодневна програма.

Градоначалникот упати покана до сите прилепчани и граѓани од целата држава да бидат дел од празничната магија, нагласувајќи дека Прилеп заслужува убава празнична приказна и заеднички моменти исполнети со насмевки и позитивна енергија.

Република

Коњановски: Инвестициите во социјалната грижа се инвестиции во иднината на Битола

Градоначалникот на Битола, Тони Коњановски, денеска оствари работна средба со министерот за социјална политика, демографија и млади, Фатмир Лимани, кој престојуваше во официјална посета на општината.

На средбата се разговараше за унапредување на социјалната заштита во рамки на надлежностите на локалната самоуправа, за продлабочување на институционалната соработка, како и за демографските предизвици со кои се соочува Битола и мерките што се преземаат за создавање услови младите да останат и да ја градат својата иднина во градот.

Во рамки на посетата, Коњановски и Лимани ја посетија новоотворената градинка „Пчеличка“, дел од ЈОУДГ „Мајски цвет“, сместена во реконструираниот објект на поранешниот Дом за доенчиња и мали деца. Градинката згрижува деца од предучилишна возраст до 6 години, со капацитет за 76 деца, и располага со современи занимални и дополнителни простории за квалитетен престој. Проектот е реализиран со заеднички средства од Министерството за социјална политика, демографија и млади и Општина Битола.

Посетата продолжи во Општинската организација на Црвен крст – Битола, каде министерот и градоначалникот остварија средба со раководството, вработените и волонтерите. Беа презентирани тековните активности во областа на социјалната заштита, хуманитарната помош и поддршката на ранливите категории граѓани. Посебен акцент беше ставен на реконструираните простории за услугата лична асистенција, која успешно се спроведува од 2018 година, како и на просторите за сервисот „Итно копче“ и услугата помош и нега во домот, како стратешки цели за 2026 година. Извршен беше и увид во просториите на идниот Дневен центар за активно стареење, кој е во фаза на градежни активности и ќе биде ставен во функција по завршување на постапката за лиценцирање.

Во рамки на денешната агенда беше реализирана и посета на Центарот за социјални работи – Битола.

Република

Во Собранието: Предлог за разрешување на Коцевски и резолуција на власта против манипулациите со мигрантите

Македонскиот законодавен дом денеска е сцена на клучна политичка пресметка. На 76-тата собраниска седница, пратениците ќе одлучуваат за две прашања кои веќе со денови се актуелни во јавноста: разрешувањето на првиот човек на Обвинителството, Љупчо Коцевски, и жешката тема со мигрантите.

Владата оди со „фронтален напад“ врз Јавниот обвинител Љупчо Коцевски. Предлогот за негово разрешување не е само процедурален, туку содржи сериозни обвинувања. Извршната власт го товари Коцевски за крупни професионални пропусти во раководењето со институцијата, неовластено изнесување податоци за судски предмети со што е компромитирана тајноста на постапките и обвинувања дека со своето постапување го деградирал достоинството на функцијата и на институцијата, спротивно на Уставот и меѓународните стандарди.

Владејачкото мнозинство (ВМРО-ДПМНЕ, ВРЕДИ и ЗНАМ) денеска ја става на гласање Резолуцијата со која планираат „еднаш засекогаш“ да го затворат прашањето за нелегалната миграција.

Координаторот на ВМРО-ДПМНЕ, Никола Мицевски, најави дека овој документ е директен удар врз, како што велат, манипулациите на опозицијата. Со деветте точки од резолуцијата, власта сака да ги демантира шпекулациите за наводна изградба на мигрантски кампови и да исцрта јасни „црвени линии“ во мигрантската политика на државата.

Дневниот ред е пребукиран со законски решенија кои опфаќаат инфраструктура, енергетика и меѓународна безбедност:

Ратификација на договорот со Бугарија за изградба на железничкиот тунел на Коридорот 8.
Државни гаранции за заеми од ЕБОР и КфВ за амбициозниот проект за фотонапонска централа во РЕК Битола и ревитализација на хидроелектраните.
Одлука за испраќање македонски војници во Либан како дел од операцијата „УНИФИЛ“ на ОН.
Нови предлози за законите за Судски совет и јавни патишта.

Седницата се очекува да помине во динамична атмосфера, со оглед на тоа што точките директно задираат во најчувствителните политички и безбедносни прашања на земјата.