САД се подготвуваат за масовно повлекување од меѓународни организации, конвенции и договори, во акција што ја означува една од најшироките редукции на глобалната ангажираност на Вашингтон во последните децении. Претседателскиот меморандум од 7 јануари, потпишан од Доналд Трамп, открива дека земјата ќе ја прекине својата врска со 66 тела и споразуми кои се оценуваат како „спротивни на американските интереси“.
Повлекувањето е дел од поширока стратегија започната со Извршната наредба 14199, објавена на 4 февруари 2025 година, која му наложува на државниот секретар да ја прегледа поддршката на САД за сите меѓународни организации, конвенции и договори. Според анализата на државниот секретар, 66 организации и споразуми се идентификувани како штетни за националните интереси, а претседателот нареди нивно повлекување и суспензија на финансирање „во обем дозволен со закон“.
Меѓу меѓународните тела од кои САД се повлекуваат се 31 агенција на Обединетите нации, вклучувајќи го Меѓународниот резидуален механизам за кривични трибунали во Хаг, кој ја завршува работата на поранешните хашки трибунали за воени злосторства во Југославија и Руанда. На листата се и економските комисии на ООН за Африка, Латинска Америка и Карибите, Азија и Пацифик, и Западна Азија, како и канцелариите за човекови права, за деца во вооружени конфликти и за борба против сексуално насилство во конфликтите. Во фокусот се и агенциите и фондовите како Конференцијата на ОН за трговија и развој, Фондот за демократија, Рамковната конвенција за климатски промени и Програмата за човечки населби.
САД исто така се повлекуваат од 35 организации надвор од системот на ОН, меѓу кои Советот за регионална соработка, кој обединува земји од Западен Балкан за регионална соработка и европска интеграција, и Венецијанската комисија, независно советодавно тело кое дава мислења за уставни прашања, демократија и човекови права. Други институции на оваа листа вклучуваат Комисијата за соработка во животната средина, Коалицијата за слобода на интернет, Глобалниот форум за борба против тероризмот и Меѓувладиниот панел за климатски промени.
Оваа одлука е продолжение на претходни потези на администрацијата Трамп, која веќе ја суспендираше поддршката за Светската здравствена организација, UNRWA, Советот за човекови права на ООН и УНЕСКО. Намалувањето на странската помош преку USAID доведе до затворање на голем број проекти на независни невладини организации, создавајќи сериозни импликации за глобалната помош и соработка.
Со овој чекор, САД ја потврдуваат својата „а ла карт“ политика кон меѓународните организации, одбирајќи кои тела и програми ги поддржуваат според националните интереси, а кои повеќе не сметаат за корисни. Поставувањето на границите на глобалната ангажираност на земјата најавува нова ера во односите на Вашингтон со светот – полна со предизвици и неизвесност за иднината на меѓународната соработка.
