Германските истражни органи денеска извршија претрес во просториите на Дојче Банк во Франкфурт и Берлин, поради сомневање за перење пари. Јавното обвинителство во Франкфурт соопшти дека неименувани менаџери и вработени биле цел на акцијата, која се случи еден ден пред банката да ги објави своите годишни резултати за 2025 година.
Истражната акција ја спроведува специјалната единица за економски криминал, во соработка со Сојузната криминалистичка полиција. Според информации, истрагата е поврзана со претходните деловни односи на банката со странски компании осомничени за перење пари, а претресите имаат за цел обезбедување дополнителни докази.
– Не можеме да откриваме детали за трансакциите или компаниите вклучени во истрагата, изјави портпаролот на јавното обвинителство.
Дојче Банк потврди дека соработува со истражните органи. – Потврдуваме дека јавното обвинителство спроведува истрага во нашите простории и ние целосно соработуваме, рече портпаролот на банката.
Банката претходно беше обвинувана за пропусти во откривањето и спречувањето на перење пари. Нејзиното седиште беше предмет на претрес во април 2022 година, а националниот финансиски надзорен орган тогаш назначи специјален претставник за следење на напредокот во борбата против перењето пари.
