Јапонија направи пробив во длабоките морски ресурси, извлекувајќи примерок седимент богат со ретки метали од неверојатни 6.000 метри под површината на Тихиот Океан. Владата ја нарекува оваа мисија „прв успешен обид во светот“ за експлоатација на ретки метали на таква длабочина, потенцирајќи ја стратегиската важност на проектот за економската безбедност на земјата.
Примерокот беше пронајден со истражувачкиот брод ちきゅう (Чикју), кој минатиот месец исплови кон островот Минами Торишима, изолиран бисер во јапонските територијални води. Според научниците, водите околу островот кријат огромни резерви на вредни минерали, кои потенцијално можат да ја намалат зависноста на Јапонија од кинеските снабдувачи.
„Сè уште ги анализираме примероците, вклучувајќи ја точната содржина на ретки метали, но овој успех е голем чекор напред за развојот на поморскиот сектор и за нашата економска безбедност“, изјави портпаролот на владата, Кеи Сато.
Група од 17 елементи на ретки метали, кои се тешко достапни во Земјината кора, се клучни за модерната технологија. Тие се користат во се, од електрични возила и хард дискови до ветерни турбини и ракети. Според проценките, областа околу Минами Торишима содржи над 16 милиони тони ретки метали, што ја прави третата по големина таква депонија во светот.
Меѓу богатствата на морското дно се издвојуваат диспрозиумот, неопходен за производство на силни магнети во паметни телефони и електрични автомобили, и итриумот, кој се користи во ласери и високотехнолошки уреди, чии резерви се доволни за цели 780 години.
