Земјотрес со проценета јачина од 4,3 степени според Рихтеровата скала вечерва во 22:05 часот беше почувствуван во поширокиот регион на Балканот, вклучувајќи ги Северна Македонија, Косово, Србија и Албанија.
Според првичните податоци, епицентарот на земјотресот се наоѓа на околу 6 километри од општина Теарце, во северозападниот дел на државата, во близина на границата со Косово.
Почувствуван во повеќе градови
Потресот бил јасно почувствуван во Скопје и околината, како и во делови од западна и северозападна Македонија. Граѓани пријавуваат краткотрајно, но интензивно нишање на објектите, придружено со силен звук.
Земјотресот бил регистриран и во Призрен, како и во други населени места на Косово, а извештаи за почувствуван потрес пристигнуваат и од јужните делови на Србија и северна Албанија.
Засега нема официјални информации за материјални штети или повредени лица. Надлежните институции ја следат состојбата и се очекуваат дополнителни податоци од сеизмолошките служби.
Од експертите се нагласува дека ваквите земјотреси, иако можат да бидат непријатни за населението, ретко предизвикуваат сериозни последици, особено ако траат кратко, како во овој случај.
Можно доцнење на официјалните извештаи
Сеизмолошките служби информираат дека официјалните извештаи може да доцнат, а граѓаните се повикуваат информациите да ги следат исклучиво преку релевантни институции.
Повеќе детали се очекуваат во текот на ноќта и утрешниот ден, по извршените дополнителни анализи.
