Изјавите на поранешната обвинителка Лејла Кадриу за случувањата во Специјалното јавно обвинителство (СЈО) не се изненадување за правосудната фела, вели вишиот јавен обвинител Јован Цветановски во интервју за „Република“. Според него, нејзините наводи претставуваат потврда на она што, како што истакнува, подолго време се шпекулирало за работењето на СЈО.
Цветановски наведува дека како обвинител во Вишото јавно обвинителство Скопје имал увид во повеќе предмети на СЈО во жалбена постапка, при што констатирал бројни процесни пропусти. Меѓу нив посочува обвиненија со слаб доказен материјал и потпирање на незаконски прислушувани материјали, што, како што тврди, било презентирано и пред Апелациониот суд, а за тоа биле изготвени и службени материјали доставени до Републичкото јавно обвинителство.
Во однос на притисоците, Цветановски вели дека тие не биле насочени кон обвинителите кои ги презеле предметите по затворањето на СЈО, бидејќи најголем дел од нив биле исти обвинители. Според него, институционалниот притисок бил насочен лично кон него поради укажувањата за квалитетот на предметите и одбивањето, како што вели, да ги „остави на заборав“.
Тој додава дека наместо институционална поддршка, против него бил покренат, како што го нарекува, „монтиран процес“ што трае повеќе од една година, со цел негова дискредитација и отстранување од обвинителската работа.
Цветановски ја критикува и постапката за надзор над неговата работа, наведувајќи дека надзорот го вршела обвинителка од СЈО која, според него, имала директен интерес во предметите, особено во делот за доделувањето на таканаречените бонуси за тајност и во случајот „Поштенски банки“. Тој оценува дека таквиот надзор бил компромитиран поради можен судир на интереси.
Во врска со бонусите во СЈО, Цветановски тврди дека токму предметот „Бонусите“ бил почеток на институционалниот притисок врз него, со, како што наведува, цел негова компромитација и трајно отстранување. Тој посочува дека за законитоста на бонусите може да се заклучи од решението на Вишото јавно обвинителство Скопје со кое било укинато решение на ОЈО за ГОКК за отфрлање на кривични пријави против обвинители од СЈО.
Како заклучок, Цветановски смета дека по згаснувањето на СЈО требало да се направи целосна ревизија на сите предмети и административното работење, што, според него, не било сторено. Тој додава дека таква ревизија сè уште е можна и би требало да ја спроведе новиот државен јавен обвинител, со цел да се обезбеди правна сигурност и неселективна правда.
Тој нагласува дека улогата на обвинителството е да гарантира владеење на правото и правна сигурност за граѓаните, а не да создава правна несигурност
Целиот текст можете да го прочитате на republika.mk
…
