Министерот за дигитална трансформација Стефан Андоновски денеска во Кочани ја промовираше првата од вкупно 69 зони со бесплатен интернет, во рамки на проектот WiFi за Западен Балкан.
Проектот се реализира со поддршка на Европската Унија, Германската амбасада и ГИЗ, а преку иницијативата #WiFi4WB се обезбедува бесплатен јавен Wi-Fi во 64 општини низ државата. Интернет пристап ќе биде достапен на јавни локации како плоштади, паркови, библиотеки, училишта и културни институции.
Според Андоновски, целта е дигиталната трансформација да стане подостапна за сите граѓани, преку олеснет пристап до дигитални услуги, поддршка за образованието и учењето, како и помош за локалните бизниси и посетители. Проектот има за цел и намалување на дигиталниот јаз меѓу различните категории граѓани.
Министерот најави и нова инвестиција за градот, посочувајќи дека наскоро Кочани ќе добие Центар за услуги на Министерството за дигитална трансформација, што дополнително ќе го подобри пристапот до јавните услуги.
