Во четврток, советниците на Советот на Општина Битола ќе заседаваат на својата шеста седница, носејќи на маса пакет одлуки што имаат потенцијал суштински да го обликуваат идниот развој на градот.
Во фокусот на расправата ќе биде Општинскиот енергетски план за 2026 година – стратешки документ со кој треба да се утврдат насоките за поефикасно користење на енергијата, рационализација на јавната потрошувачка и планирање нови инвестиции во енергетската инфраструктура. Со овој план, локалната власт настојува да постави темели за поодржлив и економичен енергетски систем.
Паралелно со развојните теми, советниците ќе дебатираат и за нов правилник во рамки на Програмата за социјална заштита. Предлогот предвидува финансиска поддршка за адаптација на домовите на лицата со попреченост – преку подобрување на пристапноста, мобилноста и функционалноста на просторот. Целта е поинклузивна заедница и услови што ќе овозможат поголема самостојност во секојдневниот живот.
На дневен ред се и финансиски прашања, меѓу кои и одлуката за проширување на Буџетот на Општина Битола за 2026 година. Истовремено, се предлага формирање Совет за женско претприемништво – иницијатива што треба да отвори нови можности за економска афирмација и поддршка на жените во бизнис-секторот.
Седницата ќе опфати и разгледување на донации од значење за урбаниот и културниот развој на градот: изработка на основен урбанистички проект за уредување на коритото на реката Драгор, како и прифаќање донација за поставување на скулптурата „Сончев часовник“ како спомен-обележје.
Меѓу точките е и давање согласност на ценовникот на КЈП „Нискоградба“ за градежни активности поврзани со канализациони објекти, во рамки на договорите произлезени од вториот јавен повик на Владата и ресорните министерства, согласно законските процедури за јавни набавки.
