Одделот за внатрешна контрола при Министерството за внатрешни работи покрена кривична постапка против полициски службеник од СВР Тетово, кој е осомничен дека изработил и употребил фалсификувана службена документација.
Според информациите од МВР, случајот се однесува на настан од јуни 2019 година, кога пријавениот, постапувајќи по барање на тетовски адвокат, составил службена белешка за наводна „достапност на лице“. Во документот, како што се наведува, биле внесени неточни податоци, без претходно извршени проверки на терен.
Дополнително, за да му се даде официјален изглед, документот бил потпишан со злоупотреба на потпис на надредено службено лице, содржел погрешен деловоднички број и бил заверен со службен печат, спротивно на пропишаните административни процедури.
Таквиот фалсификуван запис подоцна бил доставен до адвокатот и искористен во судска постапка пред Основниот суд во Тетово, каде бил приложен како доказ на штета на едно лице од градот.
Против полицискиот службеник е поднесена пријава за кривично дело „фалсификување службена исправа“, согласно член 361 од Кривичниот законик, а предметот е предаден на надлежното јавно обвинителство за понатамошна постапка.
…
