Десетина студенти биле незаконски запишани на магистерски и докторски студии на Филозофски факултет, иако не ги исполнувале законските услови за продолжување на образованието. Случајот го открил Државен просветен инспекторат, кој донел решенија за поништување на уписите.
Министерката за образование Весна Јаневска потврди дека се утврдени нерегуларности и дека се чека конечниот извештај од факултетот за да се донесе финална одлука.
– Констатирани се неправилности при упис на постдипломски студии, односно втор и трет циклус. Инспекторатот постапи и донесе заклучоци, а факултетот треба да ги спроведе – изјави Јаневска.
Деканот Оливер Бакрески информира дека станува збор за 7 до 8 студенти кои претходно имале завршено тригодишни студии и едногодишни магистерски програми. Тој нагласи дека контролата била побарана од самата институција и дека веќе се постапува по решението.
– Моравме да ги испишеме студентите, но средствата ќе им бидат вратени. Дел од нив веќе ги добија уплатените пари – рече Бакрески.
Поништувањето на уписите ги стави студентите во тежок правен и финансиски ќорсокак, со оглед дека трошоците за магистерски студии достигнуваат до 3.000 евра, а за докторски и до 6.000 евра. Дел од засегнатите веќе ангажирале адвокати и најавуваат судски постапки.
Случајот отвори сомнежи дека вакви нерегуларности можеби постојат и на други факултети, додека институциите најавуваат дека ќе се инсистира на строго почитување на законските критериуми во високото образование.
