Роковите за даночните обврзници се приближуваат, а темпото на поднесување на пријавите сè уште е далеку од очекуваното. Од Управата за јавни приходи предупредуваат дека обврската за доставување на образецот ДДВ-04 за првиот квартал од 2026 година мора да се исполни најдоцна до 27 април, откако првично утврдениот рок, 25 април, се совпадна со неработен ден.
Иако времето истекува, бројките покажуваат дека значителен дел од обврзниците сè уште не ја завршиле својата обврска. Досега се поднесени 13.934 пријави, што претставува приближно една третина од вкупно очекуваните 42.605 месечни и тримесечни извештаи.
Од УЈП апелираат до компаниите и граѓаните да не ја одложуваат постапката до последен момент. Навременото поднесување не само што ги минимизира ризиците од казни и дополнителни финансиски оптоварувања, туку овозможува и побрза обработка на податоците и поефикасно деловно планирање.
…
