Кривичниот суд одреди мерка ефективен притвор за шест лица осомничени во случајот со нелегален увоз и употреба на ботокс и дермални филери, додека на четворица им е изречен куќен притвор, а деветмина добија мерки за претпазливост.
Станува збор за организирана мрежа која е под истрага поради сомнение дека шверцувала нерегистрирани медицински препарати, кои потоа биле користени при естетски интервенции врз пациентки во земјава. Според истражните органи, дел од осомничените се лекари вработени во јавни здравствени установи, како и сопственици на приватни ординации.
Истрагата покажала дека препаратите, меѓу кои ботокс и филери од брендовите „Револакс“ и „Диспорт“, биле внесувани без соодветна регистрација, декларации и контроли од надлежните институции. Во нелегалниот синџир бил вклучен и царински службеник, кој според сомнежите, примал мито за да овозможи непречен влез на препаратите во државата.
Од Обвинителството за гонење организиран криминал и корупција информираат дека предистрагата траела со месеци, по што била спроведена координирана акција во Скопје, Струмица и Битола. Притоа биле приведени повеќе лица, а поднесена е кривична пријава против 19 физички и шест правни субјекти.
Осомничените се товарат за злосторничко здружување, повреда на права од индустриска сопственост, неовластена употреба на туѓа фирма и примање поткуп. Според обвинителството, тие свесно користеле нерегистрирани медицински средства, со што го довеле во ризик здравјето на граѓаните.
Дополнително, истрагата опфаќа и лица блиски до осомничените, кои учествувале во складирање и чување на нелегалните препарати. Дел од нив биле набавувани од Србија, Кореја и Турција, а потоа дистрибуирани и користени за естетски зафати.
Од Министерството за здравство засега нема конкретни препораки за пациентите кои биле третирани со ваквите препарати. Во меѓувреме, надлежните апелираат граѓаните да користат услуги исклучиво од овластени и лиценцирани здравствени установи.
Надлежните институции најавуваат целосно расчистување на случајот и утврдување на одговорност кај сите инволвирани.
…
