Волт Дизни, човекот кој го создаде Мики Маус и ја обликуваше модерната анимација, и децении по својата смрт останува обвиен со мистерии, митови и контроверзии. Едно од најчестите прашања е – дали неговото тело навистина е замрзнато?
Волт Дизни, роден како Валтер Елиас Дизни на 5 декември 1901 година во Чикаго, бил карикатурист, продуцент и визионер кој стана симбол на американската поп култура во 20 век. Неговите ликови, предводени од Мики Маус, обележаа генерации деца ширум светот.
Починал на 15 декември 1966 година, но интересот за неговиот живот не стивнува до ден-денес.
Според одредени биографии, Дизни бил поврзан со ФБИ и со тогашниот директор Едгар Џ. Хувер. Се тврди дека бил важен информатор и доставувал информации за луѓе од шоу-бизнисот, особено во периодот на страв од комунизам во САД.
Сепак, деталите за оваа наводна соработка остануваат делумно тајни, бидејќи дел од документите и понатаму се класифицирани.
Во текот на Втората светска војна, Дизни активно учествувал во создавање пропагандни филмови. Од 1942 до 1945 година, неговото студио продуцирало стотици кратки анимации наменети за американската војска.
Меѓу најпознатите се „Der Fuehrer’s Face“, каде Патката Доналд се соочува со стресот од нацистичкиот режим, и „Commando Duck“, каде истиот лик е претставен како воен херој.
Иако Мики Маус го прослави Дизни, тоа не бил неговиот прв лик. Пред него постоел Освалд Среќниот Зајак, создаден додека Дизни работел со Universal Pictures.
По прекинот на соработката, Дизни ги загубил правата за ликот, што го натерало да создаде нов – Мики Маус, кој подоцна стана глобален симбол.
Една од најпознатите теории е дека телото на Дизни било замрзнато со цел да биде „оживеано“ во иднина. Но, оваа приказна е мит.
Според официјалните податоци, Волт Дизни бил кремиран по неговата смрт, а неговата пепел била расфрлана во Калифорнија, во согласност со неговата последна желба.
И покрај бројните шпекулации, Волт Дизни останува запаметен како генијален креатор и визионер. Неговото наследство продолжува да живее преку филмовите, парковите и ликовите што и денес ги освојуваат срцата на милиони луѓе ширум светот.
