Во градот Лежа, на северот на Албанија, денес попладне се случи брутален вооружен напад кој заврши со смрт на брачна двојка и повторно ја потресе јавноста во регионот.
Крешник Мујеци (39) и неговата сопруга Ѓентјана (32), родители на четири деца, беа застрелани во заседа додека се движеле со автомобил во близина на излезот од селото Балдрен, околу 14:50 часот. Напаѓачите, според првичните информации, испукале повеќе од триесет куршуми кон возилото, по што веднаш побегнале од местото на злосторството.
Локалната полиција потврди дека двојката починала на лице место, а веднаш по пријавата биле активирани сите расположливи единици во пошироката област. „Се спроведува интензивна потрага за идентификација и апсење на сторителите. Истражните тимови работат на терен и ги проверуваат сите можни траги“, соопшти началникот на полицијата Арбен Насуфи.
Случајот дополнително добива на тежина поради минатото на убиениот. Крешник Мујеци претходно бил приведен во 2017 година заедно со својот брат Лин Мујеци, под сомнение за вмешаност во убиството на Генц Мхилај, ликвидиран една година претходно.
Иако истрагата е во тек и официјални заклучоци сè уште нема, неофицијални извори не ја исклучуваат можноста дека зад двојното убиство стои мотив на крвна одмазда – пракса која и понатаму повремено го оптоварува дел од регионот.
Полицијата засега не открива повеќе детали за можните осомничени, но нагласува дека работи на целосно расветлување на случајот и откривање на сите околности кои довеле до ова насилно злосторство.
…
