СВР Тетово истражува инцидент што се случил завчера вечер, кога две 18-годишни момчиња биле физички нападнати од поголема група млади лица во близина на реката Пена.
Според информациите од полицијата, случајот бил пријавен нешто пред полноќ од М.М. (18) од Тетово. Тој пријавил дека околу 23 часот, додека заедно со својот другар Л.Ф. (18) се движеле пеш по улицата „Ленин“, во близина на мостот на реката Пена, забележале група од околу дваесетина млади лица кои цртале графити.
Како што било наведено во пријавата, едно од лицата од групата им се обратило со провокативни зборови на национална основа, по што групата ги опколила. Според пријавеното, едно маскирано лице физички го нападнало М.М., додека друго лице го нападнало неговиот другар.
Пријавувачот идентификувал едно од лицата од групата како Л.Џ. од Тетово.
Од СВР Тетово информираат дека се преземаат мерки за целосно расчистување и документирање на случајот.
…
