Во време кога глобалните односи сè повеќе се соочуваат со политички поделби и недоверба, културната дипломатија останува еден од најважните механизми за поврзување меѓу државите и народите. Ова беше главната порака од 4. Форум за културна дипломатија „Скопје 2026“, кој денеска се одржа во Скопје под мотото „Од крстопати кон поврзувања: Културната дипломатија и иднината на глобалниот дијалог“.
На отворањето се обрати министерот за надворешни работи и надворешна трговија Тимчо Муцунски, кој порача дека современата дипломатија повеќе не може да се темели исклучиво на економска и политичка моќ, туку и на способноста на државите да создаваат доверба, идеи и долгорочни партнерства.
Според него, културната дипломатија денес има далеку поголемо значење отколку што традиционално ѝ се припишувало, особено во услови кога светот е технолошки силно поврзан, а истовремено општествено и политички сè пофрагментиран.
Муцунски оцени дека културата, образованието, науката и младите претставуваат важни алатки преку кои државите можат да градат меѓународен углед и стабилни односи. Тој потенцираше дека зад секоја официјална политика стојат луѓе, искуства и идентитети, поради што дипломатијата мора да ја задржи човечката димензија.
Во своето излагање, министерот посебно се осврна и на улогата на културната дипломатија во зачувувањето на мирот и развојот на меѓусебната доверба. Според него, стабилноста не се создава само по надминување на кризи, туку преку постојано отворање простор за дијалог и разбирање меѓу државите и општествата.
Тој нагласи дека земјите од Западен Балкан имаат особена потреба од ваков пристап, оценувајќи дека историските прашања не треба да претставуваат пречка за иднината, туку можност за заемно почитување и градење подобра регионална соработка.
На форумот учествуваа претставници на дипломатскиот кор, академската заедница, културни институции, меѓународни организации и експерти од повеќе држави.
Настанот беше организиран од Кабинетот на поранешниот претседател Ѓорге Иванов, во соработка со Меѓународниот центар „Алијанса на цивилизациите“ и Институтот за културна дипломатија од Берлин, а со поддршка на Министерството за култура и туризам.
…
