По повод Светскиот ден без тутун 2026 година, Министерството за здравство најави нова, поширока стратегија за засилување на борбата против пушењето и поддршката за граѓаните кои сакаат да се откажат од тутунските производи.
На заедничка прес-конференција со претставници на Светската здравствена организација, Институтот за јавно здравје и повеќе соработници, министерот за здравство Арбен Алиу порача дека фокусот оваа година е ставен на разоткривање на начинот на кој никотинот создава зависност, како и на неговата „привлечна“, но штетна природа, особено кај младите.
Како што истакна тој, државата започнува координирана акција на повеќе нивоа – преку центрите за јавно здравје, локалните самоуправи и здравствените домови – со цел да се прошири и олесни пристапот до советувалишта за откажување од пушење. Планот е овие услуги да станат подостапни на локално ниво, со подобро поврзување на граѓаните со системот за поддршка и со континуирано следење на процесот на одвикнување.
„Сакаме секој што сака да се откаже од пушење да има јасен пат, достапна помош и постојана поддршка, особено младите кои се најранливи на влијанието на тутунот“, порача Алиу.
Тој потсети дека Министерството веќе направило чекор во таа насока со ажурирање на есенцијалната листа на лекови, на која за првпат се вклучени препарати за одвикнување од никотин, како фластери и гуми за џвакање. Со ова, како што нагласи, овие средства стануваат полесно достапни и формално интегрирани во здравствениот систем како дел од програмата за намалување на зависноста.
Паралелно, најавен е и нов закон за заштита од употреба на тутун и сродни производи, кој ќе биде усогласен со европските стандарди. Целта е да се зајакне законската рамка и да се создадат долгорочни механизми за унапредување на јавното здравје.
Од Министерството порачаа дека и во следниот период ќе продолжи тесната соработка со Светската здравствена организација и Институтот за јавно здравје, особено во насока на подигнување на јавната свест за штетните последици од пушењето и поттикнување поздрави животни навики.
…
