Невниманието за малку можело скапо да го чини еден турист во Романија, кој бил толку фокусиран на својот мобилен телефон што не забележал мечка која му се приближила на само неколку чекори.
Видеото, кое брзо се прошири на социјалните мрежи, го објави платформата NEXTA. На снимката се гледа како туристот стои покрај автомобил, целосно насочен кон својот телефон, додека мечка тивко се приближува зад него.
Според објавата, мажот го забележал животното дури кога тоа се нашло непосредно пред него, по што следувал момент на шок. За среќа, инцидентот завршил без повредени.
Настанот повторно ги отвори предупредувањата за внимателно однесување во планинските и шумските подрачја во Романија, каде средбите со кафеави мечки се сè почести. Надлежните постојано апелираат посетителите да бидат внимателни, да не се доближуваат до дивите животни, да не ги хранат и да не дозволуваат мобилните телефони или фотографирањето да им го одвлечат вниманието.
Романија е дом на една од најголемите популации на кафеава мечка во Европа, а во последните години е забележан пораст на нивното појавување покрај патишта и во туристички области, што ја зголемува опасноста од вакви блиски средби.
Видеото уште еднаш потсетува дека само миг невнимание може да биде доволен за опасна ситуација кога станува збор за диви животни.
