Градоначалникот на Општина Прилеп, Дејан Проданоски, престојува во Тополчани, Словачка, по повод традиционалните „Денови на Тополчани“ и одбележувањето на 20-годишнината од соработката и збратимувањето меѓу Прилеп и Тополчани.
Проданоски, кој е во посета на покана на градоначалничката на Тополчани, Александра Гјециова, истакна дека две децении партнерство се исполнети со пријателства, културна размена, заеднички иницијативи и взаемна почит.
На средбите било разговарано за продлабочување на соработката во повеќе области, меѓу кои европските проекти, заштитата на животната средина, управувањето со отпадот, културата, туризмот и економското поврзување.
„Две децении не се само бројка, тоа се години исполнети со средби, пријателства, културна размена, заеднички иницијативи и взаемна почит“, порача Проданоски.
Тој посебно ја истакна улогата на културата во развивањето на партнерството меѓу двата града, посочувајќи ја неодамнешната посета на фолклорни ансамбли од Словачка, кои гостуваа на фестивалот „Итар Пејо“ во Прилеп.
Проданоски упати порака и преку националната телевизија на Словачка дека соработката меѓу двата града продолжува и во иднина.
„Прилеп и Тополчани остануваат пријатели, партнери и градови поврзани со трајни мостови на соработка“, истакна градоначалникот.
Одбележувањето на 20-годишниот јубилеј, според него, претставува можност да се сумира досегашната соработка, но и да се отворат нови перспективи за заеднички проекти и активности во годините што следуваат.
…
