Она што започнало како обична љубопитност на еден пензионер прераснало во неверојатна приказна за тоа како математиката може да се искористи за да се пронајде законска „дупка“ во лотарија.
Во 2003 година, Џери Селби, дипломиран математичар од Универзитетот Вестерн Мичиген, прочитал брошура за нова лотариска игра наречена Winfall. Речиси веднаш забележал нешто што другите играчи го пропуштиле.
Играта имала посебна опција наречена „rolldown“. Доколку никој не го освоел џекпотот, парите наменети за главната награда се распределувале меѓу добитниците во пониските категории. Тоа значело дека оние кои ќе погодат три, четири или пет броеви можеле да добијат значително поголеми суми.
Џери сфатил дека со купување доволно голем број ливчиња математички може да се зголеми шансата вкупната исплата да биде поголема од вложените пари.
„За три минути го пронајдов тоа“, раскажал тој подоцна за емисијата „60 Minutes“.
Прво вложил 3.600, а добил 6.300 долари
За да ја тестира својата теорија, Џери првично купил ливчиња во вредност од 3.600 долари. Добил 6.300 долари.
Охрабрен од резултатот, следниот пат вложил 8.000 долари и повторно успеал значително да ја зголеми сумата.
Тогаш во целата приказна ја вклучил и својата сопруга Марџ. Ѝ кажал дека успеал да ја „реши“ државната лотарија во Мичиген.
Двојката постепено почнала да игра со стотици илјади долари, а основале и инвестициски клуб наречен G.S. Investment Strategies. Во него ги вклучиле и пријателите, кои купувале удели од по 500 долари.
До пролетта 2005 година клубот имал 25 членови, а по 12 учества во Winfall заедно освоиле милиони долари.
Ја преселиле стратегијата во Масачусетс
Кога Мичиген ја укинал играта Winfall, Селби и неговите соработници не се откажале.
Тие пронашле речиси идентична игра во Масачусетс, наречена Cash Winfall.
Следните шест години патувале речиси 1.450 километри секогаш кога имало посебно извлекување. Купувале стотици илјади ливчиња, а потоа рачно ги сортирале.
Работата била огромна – ливчињата ги обработувале и по 10 часа дневно, десет дена по ред.
Но трудот се исплател. Според нивните пресметки, стратегијата им носела околу 4,2 милиони долари годишно.
Истражителите се посомневале во измама
Во 2011 година „Boston Globe“ открил дека на одредени продажни места Cash Winfall се продавала во необично големи количини.
Се покажало дека Селби не бил единствениот кој ја забележал математичката можност. Своја стратегија имале и студенти по математика од MIT, кои исто така заработиле милиони.
Играта била прекината, а бил покренатa и истрага поради сомневања за можна корупција или организиран криминал.
Сепак, истрагата не открила ништо незаконско. Напротив, било утврдено дека играчите едноставно ги искористиле правилата на играта и математички ја пресметале најповолната стратегија.
Заработиле повеќе од 26 милиони долари
Во текот на девет години, Џери и Марџ Селби заработиле повеќе од 26 милиони долари.
Парите ги користеле за реновирање на својот дом, но и за финансиска помош на своите деца, 14 внуци и 10 правнуци, особено за нивното образование.
Нивната неверојатна приказна подоцна стигна и до филмското платно. Во 2022 година беше снимен филмот „Jerry & Marge Go Large“, во кој брачниот пар го играат Брајан Кренстон и Анет Бенинг.
Од едноставно читање на правилата и неколку математички пресметки, Џери и Марџ успеале да создадат милионски бизнис – и тоа без да прекршат ниту едно правило на лотаријата.
…
