Велес веќе четврта недела се бори со невиден бран на грип, а последниот викенд ја достигна критичната точка. Бројот на пациенти од сите возрасти нагло скокна, предизвикувајќи огромен притисок врз Итната медицинска служба која работи со намален број вработени.
„Ситуацијата е сериозна. Луѓето доаѓаат со екстремно висока температура што не паѓа денови, силни болки во коските и мускулите, интензивна кашлица и целосна изнемоштеност“, вели д-р Славица Нешова Пановски, портпаролка на Итната помош.
Проблемот се влошува бидејќи матичните лекари не работат за време на викендот, па граѓаните масовно се упатуваат кон Итната служба за спас. Лекарите, на раб на издржливост, едвај успеваат да одговорат на сите повици, вклучувајќи ги и итните домашни посети за највозрасните пациенти.
