Инцидент на Попова Шапка – МВР до детали од настанот

Секторот за внатрешни работи Тетово работи на расчистување на случај на Попова Шапка пријавен на 16.01.2026. Според пријавеното, до конфликтот дошло околу 08:30 часот кога вработени во Ренџерската служба на Националниот парк „Шар Планина“ се обиделе да сопрат движење на машини за снег (ратраци) на приватен оператор, повикувајќи се на недостиг на соодветна документација за работа во заштитената зона. Претставник на хотелот „Арена“ пријавил дека биле неосновано спречени во вршење на дејноста и дека им било ограничено движењето без писмен налог. Од друга страна, раководството на НП „Шар Планина“ пријави кривично дело „спречување службено лице во вршење службено дејствие“ и „предизвикување општа опасност“ односно дека неколку лица со ратраци се обиделе да ги прегазат вработените во паркот, при што едно лице (ренџер) било удрено со механичка корпа и се здобило со повреди. Пријавено е и наводно несоодветно постапување на полициски службеник на местото на настанот, за што мерки презема Одделот за внатрешна контрола, криминалистички истраги и професионални стандарди. СВР Тетово презема мерки за расчистување на случајот.