Односите меѓу Вашингтон и Мадрид се заострија откако шпанската влада им забрани на американските сили да ги користат своите бази за операции поврзани со конфликтот со Иран. Американскиот претседател Доналд Трамп остро реагираше на одлуката, најавувајќи целосно прекинување на трговските и економските врски со Шпанија.
„Шпанија ни нанесе сериозна штета“, изјави Трамп на заедничка прес‑конференција со германскиот канцелар Фридрих Мерц. „Му наложив на секретарот за финансии Скот Бесант веднаш да ги стопира сите бизнис трансакции со Шпанија. Не сакаме никакви врски со таа земја“, рече тој.
Утрово, шпанскиот премиер Педро Санчез донесе одлука со која јасно стави до знаење дека неговата влада нема да учествува во операциите на САД против Иран, дури ни со дозволување на користење на шпански територии. Властите во Мадрид изјавија дека нема да се вклучат во воен конфликт кој, според нив, нема правно оправдување ниту меѓународна легитимност, бидејќи нема мандат од Обединетите нации.
Во соопштението од шпанската Влада се истакнува дека земјата не сака да стане дел од војна што ја оцени како нелегитимна и без широка меѓународна поддршка, што дополнително ја продлабочи разликата во ставовите со Вашингтон.
