Загрижувачки податоци од Институтот за јавно здравје (ИЈЗ) откриваат дека речиси една третина од децата во Македонија имаат зголемена телесна тежина, а 13,7 отсто живеат со дебелина, бројки кои ја надминуваат европската просечна стапка од 25 и 11 отсто. Најпогодени се момчињата, покажува студијата на Европската иницијатива за следење на дебелината кај децата (COSI).
Истражувањето укажува дека здравствените навики на децата се далеку од идеалните: само 25 отсто консумираат свежо овошје секој ден, а дневната консумација на зеленчук е уште пониска, 20 отсто, што ги сместува македонските деца на самиот дното во Европа. Солените и слатките грицки се вообичаена појава, 40 отсто јадат солени закуски, а 51 отсто слатки три или повеќе пати неделно.
Екраните исто така играат голема улога во животот на децата. 40 отсто поминуваат повеќе од два часа дневно пред телевизор или други уреди. Сепак, движењето не е целосно запоставено: 63,3 отсто пешачат или возат велосипед до училиште, а кај децата кои живеат поблиску од 2 километри, оваа навика достигнува 89 отсто. Повеќето деца се физички активни. 94 отсто имаат најмалку еден час активна игра дневно, а 48,2 отсто спортуваат или танцуваат повеќе од два часа неделно.
И покрај овие позитивни активности, родителите се често несвесни за вистинската состојба на телесната тежина на своите деца. Податоците покажуваат дека децата со зголемена телесна тежина и дебелина најчесто доаѓаат од семејства со низок или среден образовен статус, а повеќе од половина од родителите погрешно сметаат дека тежината на нивните деца е нормална.
„Родителите треба прво да ги прифатат здравите модели на однесување, бидејќи децата го следат примерот што го даваат тие. Доколку сакаме вистински резултати, интервенциите мора да започнат од семејството и училиштето“, истакнува д-р Игор Спировски од ИЈЗ. Тој нагласува дека веќе постојат правилници за здрави оброци во градинките и основните училишта, но нивното доследно спроведување е клучно.
Експертите предупредуваат дека потребни се системски промени: од унапредување на квалитетот на храната и етикетите, преку контрола на рекламирањето, до обезбедување безбедни и пристапни места за физичка активност во заедниците. Сè е дел од поширока стратегија за да се обезбеди здрав раст и развој на децата.
