Германија се соочува со еден од најсилните топлотни бранови досега, откако Германската метеоролошка служба (DWD) издаде виолетово предупредување – највисокото можно ниво на тревога – за екстремно високи температури на целата територија на земјата.
Во повеќе региони температурите се приближуваат до 40 степени Целзиусови, а метеоролозите предупредуваат дека најжешкиот дел од денот се очекува помеѓу 16 и 17 часот, кога е можно да бидат урнати нови температурни рекорди.
Топлотниот бран веќе остави последици. Во сојузната покраина Сарланд во петокот беа измерени 41,3 степени, што претставува нов национален рекорд. По екстремно жешкиот ден следуваше и тропска ноќ, во која температурите не се спуштија под 20 степени.
Експертите предупредуваат дека акумулираната топлина дополнително ќе ја влошува состојбата, додека Германското здружение на градови и општини ги повика граѓаните рационално да ја користат водата за пиење, со цел да се избегне воведување рестрикции.
Високите температури предизвикаа проблеми и во сообраќајот. Поради оштетувања на асфалтот и бетонот, делови од автопатите А2 и А10 беа затворени, а надлежните предупредуваат дека постои опасност од нови пукнатини на коловозите.
Погоден е и железничкиот сообраќај. Приватниот оператор National Express го прекина сообраќајот на дел од линиите во покраината Северна Рајна-Вестфалија во периодот од 13 до 19 часот, како превентивна мерка за заштита на патниците и персоналот од екстремните горештини.
Додека поголемиот дел од Германија се бори со жештините, за северните крајбрежни области е издадено предупредување за силни невремиња, град, поројни дождови и ветрови со брзина до 70 километри на час, што дополнително ја усложнува временската состојба во земјата.
