Министерката за енергетика, рударство и минерални суровини, Сања Божиновска, денеска и утре престојува во Солун, каде ќе учествува на 6. Метрополитен самит „Во пресрет на 2030 година: поврзаност и раст за Југоисточна Европа“, како и на 10. Форум за енергетика на Југоисточна Европа.
Божиновска ќе се обрати на панелот „Europe’s imperative vision for a new growth leap“, каде ќе зборува за предизвиците и можностите што ги носи новата европска реалност, со акцент на енергетската сигурност, поврзаноста и регионалната соработка.
Таа ќе учествува и на 10. Форум за енергетика на Југоисточна Европа, каде темата на нејзиното обраќање ќе биде „Security, Affordability and Competitiveness in a Changing Energy Landscape“. Фокусот ќе биде ставен на енергетската сигурност, достапноста на енергијата и конкурентноста во услови на брзи промени на енергетскиот пазар.
Според Божиновска, овие прашања имаат особено значење за Македонија, бидејќи регионалното поврзување, развојот на нови енергетски коридори и диверзификацијата на изворите на снабдување се клучни за поголема енергетска независност, стабилност и економски раст.
Особено значаен момент за време на престојот во Солун ќе биде и официјалното приклучување на Македонија кон Вертикалниот гасен коридор, преку потпишување на Меморандумот за разбирање за негово проширување.
„Македонија има што да понуди и мора активно да учествува во разговорите во кои се креира енергетската иднина на Европа“, порача Божиновска.
Со учеството на регионалните енергетски и економски форуми, Македонија има можност да ги претстави своите интереси и потенцијали, но и да биде дел од процесите за зајакнување на регионалната енергетска поврзаност и сигурност.
…
