Нова можност за вработување на граѓани од Македонија и уште 15 држави надвор од Европската Унија се отвора во Данска од 1 јануари 2027 година.
Данските власти најавуваат воведување нова програма наречена „Деловна шема заснована на колективен договор“, преку која квалификувани дански компании ќе можат полесно да ангажираат работници од земји кои не се членки на ЕУ.
На листата се наоѓа и Северна Македонија, заедно со Албанија, Австралија, Бразил, Велика Британија, Индија, Јапонија, Канада, Кина, Малезија, Молдавија, САД, Србија, Сингапур, Украина и Црна Гора.
Сепак, можноста нема да важи за сите компании. Данските работодавачи најпрво ќе треба да добијат сертификат од Агенцијата за меѓународно вработување и интеграција (SIRI).
За да може една компанија да учествува во програмата, ќе мора да работи најмалку две години и да има најмалку десет постојано вработени лица со полно работно време во Данска.
Дополнително, работодавачот ќе треба да биде опфатен со соодветен колективен договор и да поседува сертификат од Данската бизнис-администрација.
Од компаниите ќе се бара и да немаат сериозни работни спорови, активни налози од надлежните институции или неодамнешни санкции поврзани со недоволно исплаќање на странски работници.
Првиот сертификат ќе се издава со важност од три години, а последователното продолжување ќе може да биде на период од четири години.
Една од клучните ставки во новата програма е и висината на платата. Предвидено е работниците ангажирани преку оваа шема да имаат минимална годишна заработка од 322.000 дански круни, што е околу 43.000 евра.
Овој услов е значително понизок од прагот во постојната данска шема за ограничување на платите. За 2026 година, таму минималната годишна плата е поставена на 552.000 дански круни, односно околу 69.800 евра.
Новата програма би можела да им отвори дополнителни можности на квалификуваните работници од Северна Македонија кои сакаат да најдат работа во Данска, особено во услови кога европските земји бараат начини за привлекување работна сила од странство.
