Американската амбасадорка во Грција, Кимберли Гилфојл, неодамна во Солун организирала средба со високи претставници од енергетскиот сектор и партнери од Грција, Кипар, Северна Македонија и Романија, на која се разговарало за можностите за унапредување на регионалната енергетска соработка.
На средбата учествувала и министерката за енергетика, рударство и минерални суровини, Сања Божиновска, како претставник на Северна Македонија.
Во фокусот на разговорите биле енергетската безбедност, диверзификацијата на изворите и правците на снабдување, како и зајакнувањето на енергетската отпорност на земјите од Југоисточна Европа.
Посебно внимание било посветено на Вертикалниот коридор, кој има за цел да овозможи подобро регионално поврзување и поголема диверзификација на снабдувањето со природен гас.
На средбата било истакнато и значењето на зголемувањето на испораките на американски течен природен гас (LNG) кон европските партнери.
Американската страна ја нагласила важноста на енергетската безбедност, оценувајќи ја како составен дел од националната безбедност, додека Грција била посочена како важна енергетска порта кон поширокиот регион.
Преку продлабочување на соработката меѓу земјите и развојот на енергетската инфраструктура, целта е да се зголеми отпорноста на енергетските системи, да се намали зависноста од ограничен број извори и да се придонесе кон поголема стабилност во Југоисточна Европа.
…
