Македонија

Патнички воз со 150 патници излета од шините кај Кадина Река

Вагон од патнички воз на релација Гевгелија – Скопје утринава се излизгал од шините на станицата „Кадина Река“, меѓу Велес и Скопје.

Во моментот на инцидентот во возот имало околу 150 патници, но за среќа ниту еден не бил повреден.

-При поаѓање на возот број 630 кој сообраќа на релација Гевгелија – Скопје, дојдено е до излизгување односно испаѓање на едната осовина од еден патнички вагон. Само што тргнал возот едната осовина излегла. Возот застанал на самото место. Повикана е екипа од страна ЈП МЖ Инфраструктура, се работи за стручна екипа која ќе констатира поради што е настанато излизгувањето. – Никола Марков – Помошник директор за сообраќај на МЖ Инфраструктура

Патниците бргу по настанот се транспортирани во Скопје. Сообраќајот на железничката линија Велес – Скопје неколку часа била во прекин а потоа е нормализиран.

Дел од машиновозачите кои сакаа да останат анонимни за Канал 5 велат дека инфраструктурата е проблем, пругата не се одржува и не е ремонтирана со години. Од Македонски железници пак уверуваат дека проблем со инфраструктурата нема, а за последната несреќа стручна екипа ќе ги утврдува причините.

-Нема проблем. Има посебна комисија, иако е тешко да се утврдат причините поради кои е настанат инцидентот, за разлика од патниот сообраќај, тука е потешко да се утврди причината поради која е настаната самата несреќа, сепак стручните екипи ќе ги констатираат причините. – Никола Марков – Помошник директор за сообраќај на МЖ Инфраструктура

Пред само четири дена се случи железничка несреќа кога машина на МЖ Инфраструктура удри во минибус полн со патници исто така кај Велес на преминот кај поранешната фабрика Порцеланка при што беа повредени 12 лица меѓу кои и две деца. Токму на тоа место каде е слаба светлосната сигнализација а нема ниту рампи и знаци, во изминатиот период често се случуваа железнички несреќи, што ја доведува во прашање безбедноста во железничкиот сообраќај.

Македонија

Инспекциите откриваат неправилности кај матичните гинеколози

09.12.2025 – Засилени контроли од страна на Управата за јавни приходи (УЈП) и Фондот за здравствено осигурување (ФЗОМ) открија дека дел од матичните гинеколози не издаваат фискални сметки за услугите кои ги наплаќаат.

Според неофицијални информации на „Слободен печат“, мерките следат по мониторингот на невладините организации од октомври 2024 година, кој покажал дека жените често плаќале за услуги кои би требало да бидат бесплатни, а без да добијат фискална сметка.

ФЗОМ истовремено ја проширил контролата и на други сектори, вклучувајќи ја службата за итна помош, како и проверка на реалноста на боледувањата и начинот на исплата на платите. Резултатите од сите инспекции се очекуваат да бидат објавени следната недела.

Директорот на ФЗОМ, Сашо Клековски, на прес-конференцијата се осврна и на проблемот со Клиниката за онкологија при Клиничкиот центар „Мајка Тереза“, каде не се изработуваат анализи за тумор маркери.

Македонија

Мицкоски: Додека јас сум премиер, нема да никне ниту еден шатор со илегални мигранти

Премиерот Христијан Мицкоски денеска јасно го потенцираше ставот на Владата дека Македонија нема да прифати илегални мигранти и нема да дозволи поставување шатори за нив на територијата на земјата.

Повод за изјавата беа објавите на британските медиуми дека Велика Британија разгледува можност за депортирање на одбиени баратели на азил во Северна Македонија, при што секој депортиран мигрант би бил платен од британската страна. Мицкоски изјави дека со британските власти оваа тема не е разговарана и дека, доколку биде, Владата ќе ја одбие таквата опција.

„Во објавите се наведува ‘неуспешни апликанти за азил да ги праќаат во трети земји’. Да потенцирам пред македонската јавност – таква тема не е предмет на разговор, а и да биде, ќе биде одбиена од наша страна. Нашата цел е заеднички да се бориме против илегалната миграција и да ја браниме Европа“, рече Мицкоски.

Премиерот додаде дека опозицијата се обидува да го користи прашањето за мигрантите за политичка кампања, но нагласи дека борбата против илегалната миграција е фундаментална политика на ВМРО-ДПМНЕ.

Тој најави и нов проект „Безбедна држава“, инспириран од концептот „Безбеден град“, кој ќе овозможи мониторинг на македонските граници и ќе го спречи илегалниот влез, шверцот и трговијата со луѓе.

Македонија

ВЛЕН: Решени сме да ја демонтираме културата на неказнивост

По повод Меѓународниот ден против корупцијата, коалицијата ВЛЕН испрати остра и јасна порака дека овој ден не е формалност за празни изјави, туку силен аларм за „болеста“ што со години ги разградува темелите на државата.

Од ВЛЕН нагласуваат дека корупцијата не е само кршење на законот, туку предавство кон граѓаните, кражба на иднината и уништување на јавната доверба. Според нив, корупцијата не се бори со зборови или документи „за око на јавноста“, туку со храбри одлуки, чесни луѓе и целосно отфрлање на компромисите со криминалот.

„Државата не се чисти со декларации, туку со карактер. Институциите не се градат со пропаганда, туку со интегритет. А правдата не е луксуз, туку обврска“, порачуваат од ВЛЕН, истакнувајќи дека се решени да ја демонтираат културата на неказнивост и да изградат систем во кој власта не е привилегија, туку одговорност.

Во соопштението се додава дека рамнодушноста значи соучесништво, а молкот – поддршка за неправдата. „Денес не е доволно само да се осуди корупцијата, туку мора да се искорени до корен“, велат од ВЛЕН.

Коалицијата повторува дека останува непоколеблива во своите принципи: нулта толеранција кон корупцијата, нулта компромис со криминалот и нулта страв од вистината.