Царинска управа на Македонија поднесе кривична пријава против две правни и седум физички лица поради сомнение за злоупотреби при увоз и регистрација на луксузно возило „мерцедес-мајбах“ со фалсификувана документација.
Според информациите, случајот датира од 2023 година, кога употребуваното возило било пуштено во слободен промет и регистрирано врз основа на лажни документи, при што државниот буџет бил оштетен за околу 1,9 милиони денари.
Истрагата покажала дека првоосомничениот, во својство на увозник, го набавил автомобилот во Германија и го внел во земјата. Второосомничениот, кој бил царински застапник и управител на шпедитерска фирма, изготвил фалсификувана фактура со пониска вредност на возилото, како и лажен доказ за потекло, со што значително се намалиле увозните давачки.
При царинењето, наместо околу 3,9 милиони денари, биле наплатени приближно два милиони денари. Со посредство на тројца царински службеници и еден полициски службеник, возилото било пуштено во слободен промет и подоцна регистрирано.
По откривањето на неправилностите, надлежните донеле решение за дополнителна наплата, при што биле наплатени околу 2,5 милиони денари – од нив 1,9 милиони денари основен долг и околу 600 илјади денари камата.
Од Управата информираат дека дел од царинските службеници опфатени со случајот се поврзуваат и со други слични злоупотреби при увоз на возила и веќе биле отпуштени од работа минатата година.
Истрагите за незаконски увоз на автомобили започнале во октомври 2024 година, а до Основното јавно обвинителство за гонење организиран криминал и корупција досега се поднесени 51 кривична пријава против 110 правни и 396 физички лица, поврзани со увоз на околу 180 употребувани возила.
Според официјалните податоци, со ваквите кривични дела во периодот од 2022 до 2024 година е предизвикана директна штета на Буџетот од околу 41 милион денари. Надлежните најавуваат продолжување на истрагите со цел сузбивање на криминалот и обезбедување фер услови на пазарот.
