Во Скопје денеска беше ставена во функција нова специјализирана лабораторија на Стоматолошкиот факултет при Универзитетот „Св. Кирил и Методиј“, која ќе се користи за претклиничка обука на студентите и нивно практично усовршување уште во раните фази од студиите.
Инвестицијата во овој современ простор изнесува околу 10 милиони денари, средства кои се обезбедени со заедничко финансирање од Министерството за образование и наука и самиот универзитет.
На свеченото отворање присуствуваше министерката за образование и наука, проф. д-р Весна Јаневска, која нагласи дека континуираното вложување во образовната инфраструктура е директен чекор кон поквалитетна настава и подобро подготвени идни професионалци.
Таа информираше и дека вкупните средства предвидени за универзитетите оваа година надминуваат 7,5 милијарди денари, што претставува значително зголемување во однос на 2023 година, речиси двојно повеќе.
Јаневска посочи дека се очекува наскоро во собраниска процедура да влезе новиот Предлог-закон за високо образование, кој треба да донесе подобрувања во условите за студирање, како и во работата на наставниот кадар, со крајна цел подигнување на квалитетот на целиот образовен систем.
…
