За разлика од снежните бури и температури далеку под нулата во северната хемисфера , југоисточна Австралија се соочува со невиден топлотен бран. Во Јужна Австралија термометрите достигнаа неверојатни 48,5 степени Целзиусови, а метеоролозите предупредуваат дека ризикот од пожари е екстремен и за останатите региони на континентот.
Не само Јужна Австралија е на удар – во списокот на региони со критична топлина се и Викторија, Нов Јужен Велс, Квинсленд, Тасманија, Северната Територија и Австралиската престолнинска територија. „Вакви температури не паметиме во последните две децении“, истакнува Тим Вибуш, комесар за вонредни состојби во Викторија.
Екстремната топлина ја промени и традицијата: прославата на Националниот ден на 26 јануари беше откажана на голем број места, а тој ден, кој го означува пристигнувањето на британската флота, е истовремено и чувствителен за домородните заедници кои го доживуваат како почеток на колонизацијата.
Најтопло се очекува денес, со температури над 40 степени на многу локации. Во Мелбурн, каде што се игра Гренд слем турнир, термометрите ќе покажат до 43 степени Целзиусови.
Ова не е прв топлотен удар годинава – на почетокот на јануари југоисточна Австралија веќе регистрираше преку 40 степени во повеќе држави. Во Викторија тоа резултираше со разорни пожари, стотици уништени домови и една загубена човечка жртва.
Научниците предупредуваат: климатските промени го зголемуваат ризикот од вакви екстреми. Според студијата на World Weather Attribution, почетниот топлотен бран оваа година бил пет пати поверојатен поради човековото влијание врз климата. „Екстремните топлотни бранови отсекогаш постоеле, но сега се многу почести и посилни од порано“, вели климатологот Сара Перкинс-Киркпатрик.
Дури и феноменот Ла Ниња, кој обично носи олади, не може да ја намали силата на овој топлотен бран. Австралијците се соочуваат со една од најтешките температурни кризи во последните две децении, додека пожарите и климатските катастрофи стануваат сè почести и посилни.
