Украинскиот претседател Володимир Зеленски упати сериозни обвинувања кон европските партнери, оценувајќи дека нивната неажурност директно придонела Украина да се најде на раб на енергетски и безбедносен колапс. Според него, доцнењето на финансиските обврски од Западот ја ослабнало противвоздушната одбрана и ѝ овозможило на Русија да нанесе тешки удари врз критичната инфраструктура.
Во изјава за новинарите во Киев, Зеленски нагласи дека клучните системи за воздушна одбрана станале неоперативни поради недостиг од ракети-пресретнувачи. Како пример ги посочи ракетите Pac-3 за системите „Патриот“, кои биле ветени од европските партнери, но пристигнале со задоцнување од еден ден поради ненавремено извршено плаќање.
Тој оцени дека ваквата ситуација имала директни последици за цивилното население, оставајќи илјадници граѓани без струја, греење и вода во екот на најстудениот зимски период од почетокот на војната. Зеленски посочи дека уплатата во рамките на иницијативата PURL не била реализирана навреме, поради што ракетите не биле испорачани, без да наведе конкретна земја како одговорна.
Изјавите доаѓаат по рускиот ракетен напад на 20 јануари, кога, според украинските воздухопловни сили, кон земјата биле истрелани 34 балистички и крстосувачки ракети. Системот „Патриот“ со ракети Pac-3 е единствениот во украинскиот арсенал способен за пресретнување балистички ракети.
Зеленски потсети дека уште на 16 јануари предупредил за критично ниските резерви на муниција за противвоздушна одбрана, наведувајќи дека на некои позиции системите останале целосно без ракети.
Тој го поврза и својот остар настап на Светскиот економски форум во Давос со оваа ситуација, објаснувајќи дека критиките кон европските сојузници произлегуваат од фрустрацијата поради пропуштените обврски.
„Русија успеа да го наруши снабдувањето со електрична енергија и вода, затоа што нашите единици за балистичка одбрана останаа празни – едноставно празни“, порача украинскиот претседател.
