Десетици куќи и возила се поплавени во Кичево по обилните врнежи кои предизвикаа излевање на Зајаска Река, а повеќе улици во градот се целосно под вода. Поради сериозноста на состојбата е прогласена кризна состојба, информираат локалните власти.
Најкритично во Подварош
Најпогодена е населбата Подварош, каде водата навлегла во домовите, а жителите со сопствени пумпи и со помош на противпожарните екипи се обидуваат да ја испумпаат. Дел од улиците се непроодни, а оштетени се и паркирани автомобили.
Поплави се пријавени и во неурбанизираниот дел кај улицата „Прилепска“, каде според првичните информации се погодени околу 200 жители.
Активиран кризен штаб
Општина Кичево свика Кризен штаб кој ја координира акцијата на терен. Во расчистувањето и помошта учествуваат екипи на ЈКП „Комуналец“, Територијалната противпожарна единица и други надлежни служби.
За лицата на кои им е потребно привремено сместување е обезбедена спортската сала во Иванидол, каде ќе бидат згрижени најпогодените семејства.
Од општината апелираат на смиреност и внимателност, со препорака граѓаните да не се движат низ поплавените улици и подруми и да ја исклучат електричната енергија доколку постои ризик од навлегување вода во домовите.
Надлежните нагласуваат дека ќе бидат искористени сите расположливи ресурси за справување со последиците од невремето, додека состојбата на терен се следи континуирано.
