Полицаец од Струмица испратен да дејствува по пријава за нарушен ред и мир, на учесниците им предложил „да посредува“ и им договорил на „странките“ колку пари напаѓачот да даде на пријавителот за да ја повлече пријавата. Станувало збор за сума од 1.000 евра, на што полицаецот за себе побарал дополнителни 200 евра. На крајот, од 1.000 евра што ги добил од напаѓачот да ги даде на пријавителот, за себе задржал 500 евра, а за себе зел „хонорар“ од 200 евра, со што добил вкупно 700 евра.
Одделот за внатрешна контрола, криминалистички истраги и професионални стандарди при МВР до ОЈО ГОКК поднел кривична пријава против „итриот“ струмички полицаец К.Ш. товарејќи го за „злоупотреба на службена должност и овластување“ по член 353 од КЗ и од страна на судија за претходна постапка му се одредени мерки на претпазливост.
К.Ш. во саботата околу 9 часот по претходно примена пријава за нарушен јавен ред и мир со физички напад решил да посредува помеѓу страните за наводно „мирно решавање“ на настанот, при што неовластено побарал исплата на пари. Учесниците во нарушувањето на јавниот ред и мир со посредство на К.Ш. договориле на оштетениот да му се исплати сума од 1.000 евра за да се откаже од пријавата, по што К.Ш. своеволно ја зголемил сумата за уште 200 евра на име наводни трошоци за постапката.
Од вкупниот износ од 1.200 евра, К.Ш. на оштетениот му исплатил само 700 евра, додека остатокот од 500 евра го задржал за себе, со што се стекнал со противправна имотна корист од 500 евра.
Внатрешна контрола против К.Ш. ќе поднесе предлог за поведување на постапка за кршење на работниот ред и дисциплина и ќе изрече задолжителни мерки отстранување од работното место до завршување на дисциплинската постапка.
…
