Судски полицаец и доставувач од Кривичниот суд се осомничени за примање награда за противзаконито влијание, при што судот одреди различни мерки – затворски притвор за едниот и куќен притвор за другиот.
На судскиот полицаец Г. А. А. му е изречен притвор во траење од 30 дена, поради постоење опасност од бегство, како и ризик од влијание врз сведоци и докази. Одлуката за оваа мерка веќе е правосилна и постапката продолжува во рамки на надлежното одделение.
Кај вториот осомничен, Ф. Џ., кој се товари за помагање во истото дело, судот одреди куќен притвор. Мерката била изречена на 22 април.
Обвинителството побарало затворски притвор и за вториот осомничен, но судот не го прифатил предлогот, по што е поднесена жалба. За ова прашање ќе одлучува кривичниот совет, кој треба да ја разгледа оправданоста на определената мерка.
Од Кривичниот суд информираат дека постапувале согласно законските надлежности, и покрај тоа што осомничените се вработени во институцијата. Случајот е во надлежност на одделението за организиран криминал и корупција.
…
