Израелските морски сили пресретнале дел од меѓународната флота „Сумуд“, која се движела кон Појасот Газа со хуманитарна пратка, при што биле приведени и единаесет австралиски државјани.
Конвојот, кој според организаторите броел десетици бродови и стотици учесници од различни држави, бил формиран како цивилна иницијатива со цел доставување помош за населението во Газа. Во мисијата учествувале луѓе од повеќе професии – од медицина и академија, до уметност и активизам.
Од израелска страна, операцијата е опишана како интервенција против, како што ја нарекуваат, „провокативна флота“. Тамошното Министерство за надворешни работи соопшти дека при проверката на бродовите не била пронајдена пријавена хуманитарна помош, по што дел од патниците биле префрлени на израелски бродови.
Организаторите на флотилата ја оспоруваат оваа верзија на настаните, тврдејќи дека товарот бил наменет за цивили и дека акцијата се случила додека пловилата се наоѓале во меѓународни води. Според нив, израелски воени единици ги пресретнале бродовите на околу 250 наутички милји од брегот на Газа, а дел од нив биле опколени или запленети.
Флотата, која тргнала од Турција минатата недела, броела 54 бродови со околу 319 учесници. Според извештаите од организаторите, 38 пловила биле зафатени во операцијата.
Австралиските власти соопштија дека итно бараат информации за состојбата на своите државјани, додека меѓународното внимание се насочува кон нивната безбедност и развојот на ситуацијата на море.
ВИДЕОТО МОЖЕТЕ ДА ГО ПОГЛЕДНЕТЕ ТУКА
…
