Британската финансиско-технолошка компанија Revolut потврди дека доверливи податоци на дел од нејзините клиенти биле предадени на неовластени лица, откако измамници испратиле барање претставувајќи се како претставници на државна институција.
Напаѓачите го испратиле барањето од вистинскиот електронски домен на владината агенција и употребиле автентични акредитиви кои претходно поминале низ проверките на Revolut. Поради тоа, компанијата првично поверувала дека станува збор за легитимно службено барање и ги доставила побараните информации.
Измамата била откриена откако Revolut директно стапил во контакт со претставници на институцијата, при што било утврдено дека барањето не потекнува од овластени службени лица.
Според „ТекКранч“, меѓу откриените податоци може да има датуми на раѓање, домашни и електронски адреси, телефонски броеви, копии од пасоши и возачки дозволи, фотографии направени при проверката на идентитетот, банкарски изводи и историја на трансакции.
Од Revolut нагласија дека инцидентот не ги засегнал средствата на клиентите, ниту внатрешните банкарски системи. Компанијата, сепак, не соопшти колку корисници биле опфатени со неовластеното откривање на податоците.
„По откривањето на инцидентот веднаш ја блокиравме адресата и ги известивме надлежната владина агенција, органите за спроведување на законот, институциите за заштита на личните податоци и финансиските регулатори“, соопшти портпарол на компанијата.
Revolut ги известил и клиентите чии информации можеби завршиле кај измамниците. Засегнатите корисници треба да бидат особено внимателни на сомнителни телефонски повици, електронски пораки и обиди за кражба на идентитетот, бидејќи откриените податоци можат да бидат искористени за нови и попрецизно насочени измами.
