Повиците Германија да ги повлече своите златни резерви од САД стануваат сè погласни, поттикнати од влошените трансатлантски односи и непредвидливата политика на американскиот претседател Доналд Трамп. Околу 1.236 тони германско злато, во вредност од приближно 164 милијарди евра, моментално се чуваат во трезорите на Федералните резерви во Њујорк.
Емануел Менх, водечки економист и поранешен шеф на истражувањата во Бундесбанката, смета дека сегашната геополитичка ситуација носи премногу ризици. Според него, во интерес на поголема стратешка независност, Германија треба сериозно да размисли за репатријација на златото од САД.
Сличен став има и Михаел Јегер, раководител на Европската асоцијација на даночни обврзници, кој предупредува дека непредвидливите потези на Трамп, вклучително и реториката околу Гренланд, ја зголемуваат опасноста Берлин да се соочи со ограничен пристап до сопствените резерви. Тој откри дека веќе испратил официјални барања до Бундесбанката и Министерството за финансии за враќање на златото во земјата.
Темата, која долго време беше застапувана главно од крајно десничарската Алтернатива за Германија, сега се пробива и во поширокиот политички спектар. Катарина Бек, портпаролка за финансии на Зелените во Бундестагот, смета дека златните резерви се клучен симбол на стабилност и не треба да станат алатка во геополитички судири. Поддршка за оваа идеја доаѓа и од дел од демохристијаните на канцеларот Фридрих Мерц.
Од друга страна, владејачката коалиција засега не планира ваков чекор. Портпаролот Стефан Корнелиус изјави дека повлекувањето на златото во моментов не е на агендата, додека претседателот на Институтот Ифо, Клеменс Фуест, предупреди дека таков потег може дополнително да ги заостри односите и да создаде несакани последици.
Претседателот на Бундесбанк, Јоаким Нагел, увери дека нема причина за загриженост и дека германското злато во САД е безбедно. Слично мислење има и Фрауке Хајлигенштат од Социјалдемократската партија, која истакна дека резервите се добро диверзифицирани и дека со повеќе од половина од златото веќе складирано во Франкфурт, финансиската стабилност на земјата е обезбедена.
Вкупната вредност на германските златни резерви изнесува речиси 450 милијарди евра. Повеќе од половина се чуваат во Франкфурт, околу 37 проценти во Њујорк и 12 проценти во Лондон, а Бундесбанката наведува дека редовно ги проверува и ревидира сите свои залихи.
